旺角黑夜

約清晨三時，攝於旺角西洋菜南街。

一點鐘新聞報導

深夜一點鐘，開著電視仲可以睇到李臻喺 now 寬頻電視報新聞。仲記得幾年前佢喺政府總部出面罵：「有冇搞錯呀你哋香港警察」，好型。

我主要喺想睇返今日喺港鐵火車上面睇過嘅新聞片段，想知到發生咗乜事。突然間，今日好似好多新聞：

唔係好明白點解台灣人可以咁瘋狂，個貨車司機加速撞記者，佢嘅回應竟然係「擋著我怎麼過？」

呢句說話仿佛係台灣教育部長嘅心底話。兩位自持己見，前面有甚麼東西跟本沒有理會。其實我留意咗咁耐，都唔係太清楚台灣嘅教育部同埋中正紀念堂有乜關係。

諗到呢度又覺得香港好似幾好，頒個學位畀董建華都唔係太難接受，話哂佢冇搞到香港好似台灣咁衰。

中大校園又成焦點，鏡頭影到嘅同學好多都見過面，又見到大學嘅超頹保安忽然落力，極悶的畢業典禮頓時變得精彩。

竟有家長喊住咁話請假黎睇仔女畢業但係又因有人抗議影響咗典禮。呢位家長令我諗起一個新娘對完美典禮嘅追求，又令我諗呢個家長嘅仔女睇完新聞之後有乜感想。可能佢唔知到呢個典禮本身冇睇頭，又或者唔知到下午仲有書院嘅畢業禮，所以咁大反應。我相信呢位家長嘅不滿下午會得到舒緩。

幾日前有同學問我喺咪應該去畢業禮，我仲話唔使哂氣，而家有啲後悔，咁精彩嘅畢業禮真係萬中無一，我都好想去。

可能因為上鏡嘅抗議同學我都識少少，少不免牽動咗我啲情緒。

我覺得，而家嘅社會，比起我嘅感情生活更令人無奈。