迎新營我又想講

上星期身痕做O'Camp 執委，美其名係做嘢其實都係為咗返去玩。返咗工大年半，生活苦悶，又冇乜滋潤，返中大的確係遠離煩囂嘅好地方，尤其係睇住啲新生開展大學生活，而三年之後嘅事，當然係三年之後再算。

除咗做組爸或者 spy 之外，應該已經做哂喺細O可以做嘅角色。原來做完大組長之後返去做執位又係一個新嘅體會，或者我以前冇諗過執位究竟係做乜。我又開始明白，原來做唔同的位置都有佢嘅難處。

玩咗兩三年，一班做執位嘅老餅或者都睇開咗，唔再在意某啲工作應該點做點做。比着係兩年前或者三年前嘅我，一定會嘈到拆天。我咁嘅意思唔代表做嘢求其咗，只不過係，我諗有啲嘢，有佢哋自己嘅做法啩。

呢幾日同新生或輔導員傾計，佢哋都話今年 O'Camp 搞得好好，大家都玩得好開心。就我觀察所得，大家都應該玩得好開心，新生由唔熟玩到熟，雖然最後我要返工睇唔到佢哋走，但我諗應該都係盡興而歸。

不過，個 Camp 搞得成唔成功呢個問題值得深究，因為唔係新生玩得開心就叫做成功。當然啦，O'Camp 最重要係要盡興，如果盡興，大概都成功咗一大半。咁其餘個小半呢？

呢個時候我哋就要諗吓，細 O 嘅對象係乜嘢人呢？

答新生唔係錯，只不過答得唔全面。

唔知籌委又有冇盡興呢？唔知其他老餅又覺得點？

我諗新生都玩得幾熟，但唔知有幾多新生識得二年級嘅籌委呢？

而且，今年嘅安排有好多需要改善嘅地方，我諗有啲籌委都會留意得到。與其他學系比較，高低立見。如果唔係我哋氣氛好，應該都會幾麻煩。可能搞咗咁耐，有啲地方做得無咁完善，一睇就睇到。

當年我都做錯做漏好多嘢，所以我覺得咁都好正常，就好似上面咁講，我睇開咗啲。無論如何，我覺得認真少少會好啲。

如果覺得呢個諗法無聊，我有個簡單啲嘅諗法：如果O'Camp只求盡興，咁不如怒 con 新生就算了，我覺得都應該幾盡興。

我仍然覺得，CS Soc 同其他 Soc 真係有啲唔同。最少會其他 Soc 唔會有個無聊老餅返去玩 O'Camp，之後仲要寫埋啲咁嘅嘢。

後記：今年大組長做得唔錯，要讚。有啲 OC 都做得唔錯，也要讚。