直播特首睇煙花

點解無線要影曾特首影啲煙花，而唔直接影啲煙花？

取自 dchome.net。

喺年初二晚放煙花嘅途中，無線加插曾特首睇煙花嘅情況，一共三次，每次大約兩至三秒。第三次更白痴，就正正係喺緊接完場前，煙花放得最激放得最大聲果陣轉咗去影曾特首。我都明白潮流興擦鞋同埋邀功嘅，但係無線都唔駛擦得咁出面㗎喎，最衰係阻住我睇煙花（同埋影響我睇煙花嘅心情）。

其實做香港人可唔可以有啲性格，唔好因為人哋有權勢就黐埋去影人呢。而家你喺直播緊煙花呀，唔係直播緊曾特首睇煙花呀。你影胡諾言都話好啲，話哂都係我有少少鍾意嘅男藝人之一。

當然啦，同我哋嘅兩間免費電視台講性格係冇乜可能嘅。當我留意到無線嘅主持人雞啄唔斷，我就轉咗去亞視，聽到：

某女藝員：

…原來今年（日期）同埋（日期）都係宜嫁㗎喎，諗住結婚的朋友就要快啲了。

某男藝員（疑似陳啟泰）：

咁你又有冇興趣結婚呀？

果然係一山還有一山高，一豬還有一豬兜。