舉步維艱

無線新聞派者往尖沙咀採訪，了解風神襲港時的風勢，除了拍攝了記者和巿民在街上的狼狽，也有白鴿舉步維艱的情況。（無線《午間新聞》約 1 分 05 秒。）

風球除下後香港人要趕着上班，紅隧巴士站排長龍，巿民投訴天文台太早太遲除下風球，這些畫面我們都熟識，只是久違了。

李氏力場、颱風。

要嚟嘅終於嚟了

用少少時間整理咗我經常搭嘅幾條巴士線嘅新收費。

路線	目的地	原有收費	新收費	差額	加幅
68M	荃灣鐵路站	$8.4	$8.8	+$0.4	4.8%
68X	佐敦（匯翔道）	$12.5	$12.5	-	-
264M	青衣鐵路站	$9.1	$9.6	+$0.5	5.5%
268B	紅磡碼頭	$16.5	$16.5	-	-
268C	觀塘碼頭	$16.5	$16.5	-	-
269D	瀝源	$14.5	$14.5	-	-
276	上水	$7.6	$8.0	+$0.4	5.3%
968	銅鑼灣（天后）	$20.7	$21.4	+$0.7	3.4%
E34	機場（地面運輸中心）	$13.0	$13.6	+$0.6	4.6%
N269	美孚	$10.5	$11.1	+$0.6	5.7%
N968	銅鑼灣（天后）	$31.0	$32.2	+$1.2	3.9%

呢 11 條巴士線之中竟然有 4 條冇加價。搭港鐵由銅鑼灣去元朗係 $21.9，九巴新收費 $21.4，只相差 $0.5。但其實元朗出港島最平的方法應該係搭西鐵到南昌轉 K16，再喺天星碼頭搭船過海，收 $14.6，相差 $6.8。

唔明嘅唔緊要，我都冇諗住要有人明。

世紀馬房大宅

大家估吓呢度係邊度。題示：左上角臨海建築物的一帶，是中大。

港鐵：「上車莫怱怱．最緊要輕鬆」

上車莫忽忽？乜嘢忽忽呀？猩猩嗰啲？睇真啲，完來係「怱怱」。

「怱」呢個字喺國語辭典同埋中大嘅粵語音韻集成係冇收錄㗎，究竟呢個字同埋「匆」係咪相通呢？呢個我唔清楚，希望中文比我好嘅同學（亦即係所有取得 C 級或以上嘅同學）幫忙解答。

今日亦有幸見到西鐵綫班次顯示嘅背後，完來係用 Windows 98。

更新：

有不具名人士留言，提及「怱」字在「上一代」經常出現，亦舉出林子祥《千億個夜晚》的歌詞作例子。

例句：「見鬼勿Ｏ嘴，潛水怕屈機」

蘋果日報「隔牆有耳：做人別太 HKEAA」二零零八年四月二十七日

⋯⋯考試及評核局（HKEAA）忽然追上潮流，喺試題中玩潮語，點知錯漏百出𤓓到爆。

⋯⋯試題包括一個潮語解釋表，說明上述潮語含意，好似指「喪」有「極其」、「誇張」意思，不過卻將「屈機」誤解作「玩遊戲者因無法取勝而屈服」，唔少考生見到考評局知少少扮代表，當場喪笑。

⋯⋯好多人恥笑考評局，指該局自創例句：「見鬼勿Ｏ嘴，潛水怕屈機」最爆，以為有幾個潮語就係潮，其實冇人明。

後補：YouTube 影像。

巴士發展計劃

剛剛從香港交通資訊網下載了 2008–2009 年度元朗區巴士路線發展計劃，我第一次閱讀同類文件。所謂的發展，實質是重組。不過「重組」太中性了，中性會比巿民作縮減班次、取消路線等負面聯想，所以要用一個正面的字眼，聯想到只會作中性聯想。無論如何，內容不少利益考慮。

我發現：

• N968 計劃改為 N368，由西隧改為行紅隧，原因十份明顯。不過節省的隧道費沒有回饋巿民，仍收 31 港元，總站遷往中環。深夜多從灣仔、銅鑼灣區回元朗，應該比以前快一點點，但就肯定沒有空座位。
• 264M 計劃改經元朗 13、14 區。新路線應該經十八鄉路吧，那些新興建的巴士站終於有人使用了。

這本來就是香港人的公共空間

這本來就是香港人的公共空間。

難度食蕉阿叔或者警察以為自己大哂？睇住佢哋除咗影相冇嘢可以做嘅不知所惜，我覺得好好笑。

話時話一開始嘅時候嗰個男仔好似幾靚仔。XDD

騎劫公共空間

謝：小奧私陸

下一站設有分段收費

數月前朋友告知，乘坐九巴時聽到以下廣播：

「下一站設有分段收費。下一站係...」

朋友不明所以。既然乘客已上車，即已符車費，下一站是否設有分段收費對乘客而言並不重要。

對！不過，這段廣播的對象其實是司機。

理據：

1. 就車上乘客而言，是否分段並不重要。
2. 廣播內容只有廣東話，沒有英語及普通話。

簡單以言，九巴可能認為司機經常忘記調整八達通機，所以用電子報站器來提醒。

不過，我認為報站器、八達通機和電子車費顯示器可以合併，用一個按鈕來更新所有儀器，免卻麻煩。

直播特首睇煙花

點解無線要影曾特首影啲煙花，而唔直接影啲煙花？

取自 dchome.net。

喺年初二晚放煙花嘅途中，無線加插曾特首睇煙花嘅情況，一共三次，每次大約兩至三秒。第三次更白痴，就正正係喺緊接完場前，煙花放得最激放得最大聲果陣轉咗去影曾特首。我都明白潮流興擦鞋同埋邀功嘅，但係無線都唔駛擦得咁出面㗎喎，最衰係阻住我睇煙花（同埋影響我睇煙花嘅心情）。

其實做香港人可唔可以有啲性格，唔好因為人哋有權勢就黐埋去影人呢。而家你喺直播緊煙花呀，唔係直播緊曾特首睇煙花呀。你影胡諾言都話好啲，話哂都係我有少少鍾意嘅男藝人之一。

當然啦，同我哋嘅兩間免費電視台講性格係冇乜可能嘅。當我留意到無線嘅主持人雞啄唔斷，我就轉咗去亞視，聽到：

某女藝員：

…原來今年（日期）同埋（日期）都係宜嫁㗎喎，諗住結婚的朋友就要快啲了。

某男藝員（疑似陳啟泰）：

咁你又有冇興趣結婚呀？

果然係一山還有一山高，一豬還有一豬兜。

吞併之後

嘩！

簡潔統一的站牌設計別具一格，顏色鮮明字體清楚，那些「歡迎」呀，藍底或無聊圖案呀統統被棄掉。

如果有人說地鐵的指示不清楚，我會認為是他們自己的問題。

當然這個新格調也不是所有人都能接受。

大地任我行香港版的旅行書裏提到地鐵 「sleek, pristine and always on time, it is also rather soulless」。當一切太過程序化公式化的時候，系統的本身好像缺少點人情味。又或者我們十年後重臨同一個地鐵站，發現到處依久光鮮，不許每天經過的人留下任何痕跡，我們對地鐵站還能存有怎樣的感情？

對於遊客，地鐵站顯得冷酷無情，看來沒有情調，千篇一律。相反就算到一個古舊的歐洲的車站，看到破損似藏著一些歴史，也只是看來很有情調。其實地鐵站的情在於生活體驗，只有每天走進去的香港人才能感受。

減慢步伐，重溫某個角落曾出現的人和事。

地下鐵碰著他…

站牌的英文字型是 Myriad。

人多好辦事

懶，因此以篇蓋全，斷章取義，拿人家最低能的觀點來批評。

明報即時新聞「曾蔭權：人口應增至千萬」2007年6月15日

行政長官曾蔭權表示，本港人口應增至1000萬，才能追得上國際金融中心紐約及倫敦的實力。

人多好辦事？國際金融中心實力與人口多寡原來有重大關係。不過，倫敦有七百萬人，紐約有八百萬人，為何我們要有一千萬人？香港在人口數字上不用超英趕美吧！石油快消光了，追上一千萬又有何用？

若計算人口密度，香港不算特別高。不過，土地面積將郊野等也計算在內，香港有四分三土地為郊野，我們的人口密度也就應是現在的四倍，曾生想將未來的四成人口放到那裡去？我只希望他不會打郊野公園的主意。

香港真的要做紐約倫敦嗎？前陣子我好像聽過誰說不能將英美的一套照搬過來喔。

幾時有普選？

幾個月前經常聽到二零一二，而家突然又話二零一七。十年喎，人類滅亡咗都有機。

昨日梁生又走出黎叫我哋思源，重覆提醒我哋選個特首要中央任命，意思即係上面唔鍾意就可以唔任命。香港人知架啦，唔駛成日提醒。

簡單而言，佢意思即係香港人其實連自己想揀邊個做特首都唔得，要問吓上面意見先。唔難想像上面會拋咗啲人名落黎，只係得一個揀得落手，選完。

其實梁生諗複雜咗啦，上面唔鍾意邊個做特首自然會放風，一班利益為首的香港人自然會識做架啦。

唔知大家係咪鍾意咗「穩定勝到一切」呢個概念呢，聽到憲制危機就覺得一定要避免，仲要搞到選個特首都要問定先，其實，選咗出黎上面真係唔滿意咪再選過囉。唔知有幾多人會同意，但起碼同全世界同後代講咗我哋嘅意願，否則選咗個布殊出黎全世界自會覺得我哋白痴。

自己揀㗎，點解仲要問阿媽呢個嗰個揀唔揀得？如果係咁我就唔想揀了。

理論上澳洲英國的首相由君主或其代理人任命，理論上人民揀乜佢可以唔任命，又或將某個首相拉下（實際上當然是另一回事）。咁佢哋嘅人民係咪應該問吓君主嘅意見呢？

上面唔會無啦啦唔任命某某個嘅，而且上面係咪應該尊重下我哋嘅選擇呢？香港人哋識揀架啦。我原全接受唔到有啲人（甚至有啲香港人）話我哋唔識揀，話我哋冇資格有普選。我哋唔係咁高要求啫？其他地區（甚至台灣。對！我係要用「甚至」。）行咗咁耐都唔見有乜嘢大問題喎，我覺得香港人更加值得有普選囉。「烏托邦式」？佢想講嘅係冇可能發生定係美國英國加拿大澳洲台灣日本用緊嗰啲係「烏托邦式」？

不雅超連結？

除一般影碟封套和色情圖片外，送交評級的物品種類層出不窮。影視處曾將 Google 搜尋器上出現的一條超連結送交評審，該超連結顯示為「超級血腥殘忍……實錄」，可連接到一篇暴力小說，最終小說被評為淫褻，超連結被評為不雅。- 《明報》「不雅淫褻裁決界線模糊」2007年5月21日

超級血腥殘忍……實錄 ＜呢條就係超連結啦，呢條超連結就係不雅？

又唔見影視處覺得呢個投訴無聊？又唔見律政司告 Google 發放不雅物品？告都好呀，再造一個笑話。「亞洲國際都會」就係咁㗎啦。

各位，超連結係啲好簡單嘅嘢，就只係一個唔洗大家動手將網址再輸入瀏覽器嘅方法。我覺得佢地評超連結不雅，咁即係等於同人講：「街口報紙檔可以買到本三級咸書喎。」＜呢句嘢就會係不雅。

不如我用膠袋包住自己就算了。

睇到我眼火爆

估唔到黃金討論區嘅朋友咁有創意，連聖經都攞去影視處要求送檢。一提及呢本「人類文明的一部分，歷代相傳」的書仔有機會被評為二級不雅，即有各大外國傳媒機構報道事件。唉，我哋香港人又成功創造咗一個國際大笑話。

呢個笑話之所以可以流傳開去，全有賴各方單位的幫助。記得當初將學生報送檢嘅時候，影視處將涉及的情色版送檢，當時有審裁員堅稱只要刊物有一部份係不雅嗰份刊物就係不雅。而家有人將聖經裏嘅某啲章節斷章取義攞去投訴，點解又要成本書仔咁睇呢。

報道引述明光社總幹事蔡志森形容投訴「幼稚、無聊、無知」。「他批評網站的指控並不成立，《聖經》記載歷史，當中確曾出現亂倫事件，但這與贊成、鼓吹是兩回事，當中亦沒有任何性行為的描述。」這些說話套回在中大學生報上，難道不也合適得很嗎？ - 《為甚麼要投訴聖經？》(inmediahk.net)

我都唔係太明，佢地話聖經係人類文明的一部份，咁點解之前又要將大衛像攞去送檢？原來我哋嘅社會對於人類文明的組成要求極高，幾百年只係濕濕碎。

香港有司法覆核真係好，最少我哋覺得有部門唔跟法律做嘢都可以有方法阻止佢哋，我都有啲懷疑影視處係咪有權咁做決定。

成件事，我最唔滿意係啲人話嗰啲投訴聖經嘅人濫用投訴制度。

究竟係邊啲人濫用投訴制度先呢？一班所謂身處道德高地嘅人（唔好意思，我字匯唔夠豐富，唔識點樣形容嗰啲以為自己嗰套先係啱先係真理嘅人，暫時用住道德高地先，又或者用「明光社」都可以），見到有啲乜嘢唔滿意，投訴咗先，總之投訴咗就有人做嘢，評咗做不雅又自然會有人罰佢地，幾方便，完全唔洗自己出手。唔該你唔好係佢哋濫用咗投訴制度之後先叫我哋唔好，我只會覺得你有病。

而家問題係投訴制度有問題呀，我哋而家係要一個公平公正公開嘅投訴制度，唔係要一個有病嘅人走出黎叫人唔好濫用。

我住香港，一直都想見到一個法治社會。不過，我成日都只見到一個以法治國嘅社會。仲有，Due process 呀你係邊？我唔係淨係要個答案啱咁簡單囉，我係要個過程都啱呀。

睇到我眼火爆。

睇黎，呢件事都好難就咁就算，我都唔想係就咁就算。

中大學生報新聞／評論／聲明連結

http://del.icio.us/cheungpat/cuspnews

這個社會令我感到不安

《學生報》的事件發展至今天，已經不只是內容是否適合的爭論，討論已包括道德、大學之道、自由、法治甚至政治。這個星期我學得不少深字詞：例如「道德高地」。

有言論指出，今次事件可能是明光社發動的。該組織早有前科，我對該組織的行徑恨之入骨。無論此事是否屬實，不影響我對事件的意見。

我不同意各界以「內容令人不安」的理由而去禁止《學生報》論述有關的話題。個人認為，今天很多的社會問題都會令人不安，繼有同性戀近年較為令人接受之外，其餘的問題如更換性別等，更是市民無法想像的，談及這些問題絕對會令人不安。就算如此，那社會就可以禁止其他人去談這些問題嗎？如果你的答案是肯定的，歡迎你加入明光社。

在這件事情裡，我看到的是香港的言論自由正在收縮。今天社會可以禁止《學生報》詢問有否想過和動物做愛，明天社會也可以「不安」為由去禁止他人問曾否想過改變性別。今次事件就是數月前《同志．戀人》事件的翻版，我看到的是衛道之士透過投訴來限制他人對某些社會議題的言論自由，實際上是他們反對這些議題，向提出這些議題的人開戰。

這些議題（就是和性有關的議題）現在就已經應該要討論了，要再等社會減少對問題的「不安」再談嗎？明光社會告訴你：「是。」如果事情真的要如明光社所要的方法發展，那就讓我「可再生在某夢幻年代」（《禁色》歌詞）。

今次事件與言論自由

衝破禁忌 重建道德 要求影視處判決中大學生報無罪聯署聲明

（我仲未講完）

真係好靚

我覺得住元朗其中一個好處係返工同放工都要搭車（竟然係一個好處），絕對係 everyday has a trip。

如果搭巴士就最好，元朗的巴士大部份都經三號幹線出九龍，經過汀九橋嘅時候，又或經過屯門公路出荃灣嘅時候，個景真係仲靚過維港啲俗氣嘅燈色。巴士的闊玻璃畀我一眼睇哂咁多條大橋和海景山景，可惜嘅係幾分鐘就駛過咗，唔係有錢就可以留住個景慢慢欣賞。靚景，唔駛特登搭飛機去搵㗎。

如果大家覺得香港好唔掂，冇民主空氣唔好甚至連對性的滿意程度都係全球最低嘅幾個地區之一，咁你就應該睇吓今期的 HK Magazine，有乜嘢係香港第一。

各位香港人：香港唔係咁差啫。

教我失望的五一

這月「消費」等字充斥各大媒體，令人反感。

每年這個時間，總會對周遭很多事物感到不滿，最為不滿的是純簡體字之告示，內容大概是熱烈歡迎內地同胞五一黃金周來港消費大優惠。那個被明報放蛇的香港導遊也許說得對，「香港人就是向錢看」，某些時候，我覺得香港的文化就在乎於何處有錢可賺，完全沒有自己的一套。

更失望的是我們的旅遊業的對象單一化，振興旅遊業就好像與給引內地人來港成為了同義詞。更可笑是有人以為振興的方法包括興建新景點，一些所謂的新景點又沒有內涵。我以為旅遊點多因它們有歷史、文化的重要性，又或者本身就值得欣賞。既然這些都沒有，就唯有人工興建吧。

傳媒給我的感覺，黃金周好比旱天一場大雨，內地人大舉來港消費，我們將一下子得到一筆可觀的收入。原來，這星期我們只招待內地人，而且他們來港就只有消費，第三個失望。

本來以為劏客事件被廣泛報導後遊客量會下跌，結果也是「失望」。