無奈

今日我又諗起呢首歌：

是你嗎？你在微微地笑
心跳 如今確是奇妙

在「魁北克」的哥哥、巴士上面的學生、小巴回望嘅男仔……

哈哈，我好變態，經常望住街上邊啲人

但係除咗多啲去文化中心「魁北克」之外我都諗唔到可以做啲乜。

之後我又諗到第二首歌嘅歌詞，來自另一個音樂劇：

我盼當我走到盡頭　他可伴我在身旁

呢句歌詞之後，其實仲有一句。

搭巴士

昨晚放工我好得閒，走咗去尖沙咀警署門口搭 6A 去深水埗，原本搭地鐵只係十分鐘，搭巴士要半個鐘。

就係我等緊車嘅時候後面有個男仔，我留意咗佢好耐，我諗佢細過我少少掛。佢不停咁望住啲車黎緊個方向，好似好趕時間咁。而我，就一時望吓車，一時望吓佢咁。

終於佢開口同我講嘢啦：「阿哥！請問呢度係咪成日塞車㗎？」

唔係嘛？我唔係大你好多咋喎，你叫我做阿哥？乜嘢意思先。我都唔知開心定唔開心好。最後指咗佢落去地鐵站搭地鐵。

搭巴士返屋企嘅時候成日都會坐下層尾嗰幾排，要對住坐果啲位，仲要坐倒頭車，事關嗰啲位唔會有人坐，唔駛爭唔駛煩。

咁當然係呢啲時候就會留意吓坐對面果個係乜水啦，咁又咁啱有個男人坐咗係我對面喎，跟住我又留意咗佢好耐啦。當然唔係直望啦，想俾人打咩。

就係呢啲閃閃縮縮心情緊張嘅時候，咁啱 iPod 仔播林一峰嘅晚睡（思生活）

「好不容易遇到一個人
他讓你心動卻讓你傷神」

坐到差不多啲人都落哂車，佢都仲係坐係我對面。

最後，佢先落車，但我冇跟住。

「就在下個街口
遇到喜歡的人
這種憧憬未免太天真」