元朗人士

琴日經過銅鑼灣，並且在菠蘿嘅協助之下入咗一間髮型屋剪頭髮，位置大概係 St. Paul Convent 的附近，旁邊有一間好舊好舊的飽店，十足十《店鋪》上環果啲海味鋪咁。間飛髮鋪就好正常。入去，頹講自己想剪成點，講完，剪完，98 元。我主要想講嘅係，個哥哥幫我剪髮嘅時候問我係咪住喺附近。同佢講左幾句，之後足足開心咗一個鐘。

夜晚未食飯就返咗元朗去睇彩兒做 SM 嘅小劇，大概，小劇一係講三角戀啦，係一套好慢好慢的劇目，而且只有演員講嘢同行黎行去，都幾難頂（主要係肚餓的關係）。我覺得套劇除咗慢之外，係畀咗好多時間我諗其實佢地係乜野關係，因為套劇由頭到尾我諗咗好多個唔同嘅可能性。究竟係兩個男爭女定係個女同個男爭呢？或者個女仔到最後先講野俾多咗時間我諗其他嘅可能、又或者，我仲係太掛住《盛夏光年》啲情節，哈哈！

最近經常諗起喺咪應該搬出去住，如果搬咗出去，就更加同屋企人疏遠。究竟其實去到我哋呢個年紀，同屋企人嘅關係應該係點嘅呢？生離死別係諗得太早定係愛得太遲？如果唔似得以前咁每個禮拜可以一齊去飲茶，咁究竟應該由得佢係咁發展落去定係點呢？究竟搬出去住，係叫做擁抱自己的生活定係離屋企人而去？睇黎未睇得化之前都幾難搬得走。小戲二唔係講身離死別，呢啲只係聯想出黎。

初生劇團，一個元朗的小劇團，成員都係後生細仔。

每次睇完啲朋友做嘅劇就會覺得，如果可以幫手玩吓就好了，因為我覺得，做一啲唔同嘅嘢有助我變得無咁灰。

晚上食元朗特色炒冰，得閒入黎元朗試下啦各位。