旺角唱Ｋ

琴日同菠蘿兩個人唱通Ｋ，我好乖仔㗎其實，係佢帶壞我囉，仲要迫我夜晚十二點幾搭車出旺角去 Neway （元朗明明有 Neway 㗎嘛），佢應該請我（所以我都冇比足錢，哈哈）！

我唱咗好多好多何韻詩林一峰楊千嬅嘅歌呀，咁實情我又只係識得佢地啲歌。我識唱幾句《愛情萬歲》呀，突然之間覺得自己好 in。如果多人就唔唱咁多啦，費事大家奇怪冷氣校極都係咁凍，同埋來來去去都係唱果啲歌悶親人。

去唱Ｋ之前喺旺角買咗隻 W theatre X Michael Tsang Music Collection，其實隻碟攣到爆完場嘅時候介紹過㗎，冇買囉。我見佢係旺角 Widesight 個架上面等咗咁耐，終於都等到我買佢啦。

其實我都想買㗎，裡面有林一峰唱《一個》（攣到爆主題曲），第二度搵唔到（加啲頭抽先）。隻碟裡面嘅音樂係 W 創作社音樂總監 Michael Tsang 嘅作品，真係好好聽囉，有啲別具一格嘅感覺。哈哈～（唔知自己講緊乜）仲有曾曉淇唱歌好好聽吧聲好靚呀，感覺真係好似 Angel's Voice 咁。歌詞當然又係好正啦。

點解我唔早啲識得睇林一峰或者 W 創作社呢？如果係嘅話我咪可以睇到《馴情記》和《你今日拯救咗地球未呀？》真係可惜。

隻碟同 Empty 一樣令人感動，真係強烈推薦。

搭單：原來九巴 N102 已經摺埋咗啦，風雨夜歸人可以搭 N122 返屋企。