想像力

中秋節，喺天台同屋企人燒嘢食同埋賞月。

雖然天文台話可能睇唔到個月亮，但係嗰日大部份時間都見到個好圓好圓嘅月光，附近有少少雲陪住個月亮，所以唔覺得個月亮孤令令喺個天空上面。

我見到天空咁大，俾少少想像力，自己喺個地球入面比啲大氣層包住，上面個月亮圍住自己轉...點解佢唔會跌落黎呢。

呢個時候又食多兩件雞翼，又桔多兩件雞翼嚟燒。

之後又攞咗兩件月餅嚟食，幾好幾好。遺憾嘅係冇汽水，如果有嘢冰凍嘅汽水就 fit 哂啦。

當然又睇吓電視，同屋企人傾計呀咁。（電視搬咗上天台。）

好似冇點燈籠，唔興掛，我諗。

我又諗，點解呢個活動要叫做賞月呢，其實，真係無乜去望個月亮。話哂佢都係主角，如果我係佢比人冷落咗都幾無奈。

天氣清涼，如果可以喺天台度瞓，地係床以天係被，應該幾得意。

「凍死你呀！」

今朝攞起隻杯，睇到杯內雪白無比，覺得屋企人真係好。

夜晚返屋企見到間房有人執過，原全無咗嗰種溫馨嘅感覺，只係覺得要將啲嘢打亂返好麻煩。

人真係奇怪，要諗咁多嘢。